ଆତଙ୍କିତ ହୁଅନ୍ତୁ ନାହିଁ

ବାଇବଲ ଆମକୁ କହେ ଯେ, ଆମେ ଏକାକୀ ରହିବା ନିମନ୍ତେ ନୁହେଁ, ବରଂ ପରସ୍ପରକୁ ସାହାଯ୍ୟ ଏବଂ ସମର୍ଥନ କରିବା ପାଇଁ ଆମକୁ ଆହ୍ୱାନ କରାଯାଇଅଛି । ଗାଲାତୀୟ ୬:୨, ପରସ୍ପରକୁ ସାହାଯ୍ୟ କରିବାର ମହତ୍ତ୍ୱ ବିଷୟରେ ଆମକୁ ମନେ ପକାଇଦିଏ, ବିଶେଷକରି ଆବଶ୍ୟକ ସମୟରେ ।

ନିକଟରେ ଦୁବାଇରେ ଏକ ମିଶନ ସମ୍ମିଳନୀରେ ଯୋଗ ଦେବା ସମୟରେ କେହି ମୋ’ର ଆବଶ୍ୟକ ସମୟରେ ମୋ’ତେ ସାହାଯ୍ୟ କରିବା "ଈଶ୍ଵରଙ୍କ ଅନୁଗ୍ରହ" ବୋଲି ମୁଁ ଅନୁଭବ କଲି । ମୁଁ ଏବଂ ମୋ’ର ବନ୍ଧୁମାନେ ବିଳମ୍ବିତ ରାତିରେ କିଛି କିଣିବା ପାଇଁ ବାହାରକୁ ଯାଇଥିଲୁ ଏବଂ ଯେତେବେଳେ ଆମେ ଅନୁଭବ କଲୁ ଯେ, ଆମେ ଶେଷ ମେଟ୍ରୋକୁ ହରାଇ ଦେଇଛୁ, ସେତେବେଳେ ଆମେ ନିଜକୁ ଅବରୁଦ୍ଧ ହୋଇ ଯାଇଥିବା ଅନୁଭବ କଲୁ | ଆମେ ରହୁଥିବା ହୋଟେଲ ଦୂରରେ ଥିବାରୁ ଆମେ ଅସହାୟ ଅନୁଭବ କରୁଥିଲୁ ଏବଂ କ'ଣ କରିବୁ ସେ ବିଷୟରେ ଅନିଶ୍ଚିତତା ମଧ୍ୟରେ ଥିଲୁ । ପ୍ରଥମ ଥର ଏକ ନୂଆ ଦେଶ ଭ୍ରମଣ କରିବା ଏବଂ ମାର୍ଗହୀନ ହୋଇଥିବାରୁ ଏହା ଆମ ପାଇଁ ଟିକିଏ ବିଭ୍ରାନ୍ତିକର ଥିଲା ।

କିନ୍ତୁ ଏହାପରେ ଜଣେ ପାକିସ୍ତାନୀ ବ୍ୟକ୍ତି ଆମ ପାଖକୁ ଆସି ସାହାଯ୍ୟ କରିବାକୁ ପ୍ରସ୍ତାବ ଦେଇଥିଲେ। ସେ ଆମକୁ ଆମ ହୋଟେଲକୁ କିପରି ଫେରିବାକୁ ହେବ, ସେ ବିଷୟରେ ମାର୍ଗଦର୍ଶନ କରିଥିଲେ, ଏପରିକି ଆମେ ସଠିକ୍ ମାର୍ଗରେ ଅଛୁ କି ନାହିଁ ତାହା ସୁନିଶ୍ଚିତ କରିବା ପାଇଁ ଆମ ସହିତ ଅଧାବାଟ ଚାଲିଥିଲେ । ଏହା ଆଶ୍ଚର୍ଯ୍ୟଜନକ ବିଷୟ ଯେ, ଜଣେ ପାକିସ୍ତାନୀ ବ୍ୟକ୍ତି ଜଣେ ଭାରତୀୟ କିମ୍ବା ଜଣେ ଭାରତୀୟ ଜଣେ ପାକିସ୍ତାନୀଙ୍କୁ ସାହାଯ୍ୟ କରୁଛନ୍ତି । ଏହି ବ୍ୟକ୍ତିଟି ଈଶ୍ଵରଙ୍କ ଦ୍ୱାରା ପ୍ରେରିତ ସହାୟକ ପରି ଥିଲେ, ଯେତେବେଳେ ଆମକୁ ଏହାର ସର୍ବାଧିକ ଆବଶ୍ୟକତା ଥିଲା ସେତେବେଳେ ସେ ଆମକୁ ଦୟା ଏବଂ କରୁଣା ଦେଖାଇଥିଲେ ।

ଏଭଳି ମୁହୂର୍ତ୍ତରେ ଭୟଭୀତ ହେବା ସହ ଆତଙ୍କିତ ଅନୁଭବ କରିବା ସହଜ । ତଥାପି, ଆମେ ପରମେଶ୍ୱରଙ୍କ ଉପରେ ଭରସା ରଖିବାକୁ ମନେ ରଖିବା ଏବଂ ବିଶ୍ୱାସ ରଖିବା ଉଚିତ ଯେ, ସେ ଆମକୁ ସାହାଯ୍ୟ କରିବେ । ଆମକୁ ଏହା ମଧ୍ୟ ମନେ ରଖିବାକୁ ହେବ ଯେ, ଆମେ ଏକା ନୁହଁ, ଈଶ୍ଵର ସେହି ଲୋକମାନଙ୍କୁ ପଠାଇବେ ଯିଏ ଆମକୁ ଆବଶ୍ୟକ ସମୟରେ ସମର୍ଥନ ଏବଂ ସାହାଯ୍ୟ କରିପାରିବେ ।

ତେଣୁ ଆସନ୍ତୁ, ଗାଲାତୀୟ ୬:୨ରୁ ପ୍ରେରଣା ନେଇ ଆବଶ୍ୟକ ସମୟରେ ପରସ୍ପରକୁ ସାହାଯ୍ୟ କରିବାକୁ ଚେଷ୍ଟା କରିବା । ପରମେଶ୍ୱରଙ୍କ ଉପରେ ଭରସା ଏବଂ ବିଶ୍ୱାସ ରଖନ୍ତୁ, ଜାଣି ରଖନ୍ତୁ ଯେ, ସେ ଆମକୁ ସାହାଯ୍ୟ କରିବେ ଓ ଜରୁରୀ ଆବଶ୍ୟକତା ସମୟରେ ଆମକୁ ମାର୍ଗଦର୍ଶନ କରିବା ପାଇଁ ସହାୟକ ପଠାଇବେ। ଆମେନ୍ ।