ଏକ ନକାରାତ୍ମକ ଜଗତରେ ଆଶାର ଅନ୍ଵେଷଣ କରିବା

ନକାରାତ୍ମକତାରେ ପରିପୂର୍ଣ୍ଣ ଜଗତ ମଧ୍ୟରେ ଆଶା ଓ ଆନନ୍ଦ ହରାଇବା ସହଜ ଅଟେ । ବ୍ୟକ୍ତିଗତ ଭାବରେ ଆମେ ସମ୍ମୁଖୀନ ହେଉଥିବା ଆହ୍ୱାନଠାରୁ ଆରମ୍ଭ କରି ଜଗତର ଅତ୍ୟଧିକ ସମସ୍ୟା ପର୍ଯ୍ୟନ୍ତ, ପ୍ରେମ ଓ ଆନନ୍ଦ ଆମ ଜୀବନରୁ ଦୂରେଇ ଯିବାର ଅନୁଭବ ହୋଇପାରେ ।ଆପଣ ଜାଣନ୍ତି କି, ଆପଣଙ୍କ ଆଖପାଖରେ ଘଟୁଥିବା ନକାରାତ୍ମକ ବିଷୟ ଗୁଡ଼ିକ ଆପଣଙ୍କ ହୃଦୟକୁ କଠୋର କରିବା ଏବଂ ଈଶ୍ୱର ଏବଂ ଅନ୍ୟମାନଙ୍କ ପ୍ରତି ଆପଣଙ୍କର ପ୍ରେମକୁ ହ୍ରାସ କରିବାର ଶକ୍ତି ରହିଛି ।

ଯୀଶୁ ମାଥିଉ ୨୪:୧୨ରେ ଆମକୁ ସତର୍କ କରାଇ ଦେଇଛନ୍ତି ଯେ, ଯେତେବେଳେ ଅଧର୍ମ ବଢିବ, ଅନେକଙ୍କ ପ୍ରେମ ଶୀତଳ ହୋଇଯିବ। ଯଦି ଆମେ ଅନୁମତି ଦେବା ତେବେ ଜଗତରେ ନକାରାତ୍ମକତା ଧୀରେ ଧୀରେ ଆମ ହୃଦୟକୁ ନିରାଶାର ସ୍ତରରେ ପୋତି ଦେଇପାରେ । ତେବେ ଏଭଳି ନକାରାତ୍ମକ ଜଗତ ମଧ୍ୟରେ ଆମେ କିପରି ସକାରାତ୍ମକ ରହିପାରିବା?

ଏହାର ଉତ୍ତର ଯିହୋଶୂୟ ୧:୯ରେ ଅଛି, ଯେଉଁଠାରେ ପରମେଶ୍ୱର ଯିହୋଶୂୟଙ୍କୁ କହିଛନ୍ତି:ବଳବାନ ହୁଅ ଓ ସାହସିକ ହୁଅ; ତ୍ରାସଯୁକ୍ତ ହୁଅ ନାହିଁ, କି ହତାଶ ହୁଅ ନାହିଁ । ଏମାନେ ବିରୋଧୀ ଶକ୍ତି ଏବଂ ଆମକୁ ଉଭୟ ତ୍ରାସ ଓ ହତାଶକୁ ପ୍ରତିହତ କରିବାକୁ ପଡ଼ିବ। ସଦାପ୍ରଭୁ ଆପେ ଆପେ ଏହି ନକାରାତ୍ମକ ଭାବନାକୁ ଦୂର କରନ୍ତି ନାହିଁ; ବରଂ, ସେ ଆମ ମଧ୍ୟ ଦେଇ ପ୍ରବାହିତ ହୁଅନ୍ତି। ଏଫିସୀୟ ୩:୨୦ ଆମ୍ଭକୁ ଶିକ୍ଷା ଦିଏ ଯେ,ଈଶ୍ଵର ଆମ୍ଭମାନଙ୍କ ଅନ୍ତରରେ କାର୍ଯ୍ୟ ସାଧନ କରୁଥିବା ଆପଣା ଶକ୍ତି ଅନୁସାରେ ଆମ୍ଭମାନଙ୍କ ମାଗିବା ବା ଭାବିବାଠାରୁ ଅତ୍ୟଧିକ ପରିମାଣରେ ସାଧନ କରି ପାରନ୍ତି। ଯେତେବେଳେ ଆମେ ନିରୁତ୍ସାହିତ ହୋଇଥାଉ, ଆମେ ପରମେଶ୍ୱରଙ୍କ ଶକ୍ତିର ପ୍ରବାହରେ ବାଧା ସୃଷ୍ଟି କରିଥାଉ।

୧ ଶାମୁୟେଲ ୩୦:୬ ରେ ଥିବା ଦାଉଦଙ୍କ କାହାଣୀ ଉପରେ ବିଚାର କରନ୍ତୁ। ସେ ଏକ ଭୟଙ୍କର ପରିସ୍ଥିତିର ସମ୍ମୁଖୀନ ହୋଇଥିଲେ, ତଥାପି ସେ ସଦାପ୍ରଭୁଙ୍କ ଠାରେ ନିଜକୁ ଉତ୍ସାହିତ କଲେ। ଦାଉଦ ପରମେଶ୍ୱରଙ୍କ ବାକ୍ୟ ଗ୍ରହଣ କଲେ ଏବଂ ତାହାକୁ ତାଙ୍କ ଆତ୍ମାର ଉନ୍ନତି ପାଇଁ ବ୍ୟବହାର କଲେ। ଅତ୍ୟନ୍ତ ଖରାପ ପରିସ୍ଥିତି ସତ୍ତ୍ୱେ ସେ ପରମେଶ୍ୱରଙ୍କ ପ୍ରତିଜ୍ଞା ଗ୍ରହଣ କଲେ ଏବଂ ସେଗୁଡ଼ିକ ସଫଳ ହେଉଥିବା ଦେଖିଲେ।

ସ୍ୱୀକାର କରନ୍ତୁ ଯେ ଶୟତାନ ଆପଣଙ୍କୁ ନିରୁତ୍ସାହିତ କରିବା ପାଇଁ ଏହି ଜଗତର ନକାରାତ୍ମକ ପ୍ରଭାବ ବ୍ୟବହାର କରେ। ଆପଣଙ୍କ ମନକୁ ରକ୍ଷା କରନ୍ତୁ ଏବଂ ପରମେଶ୍ୱରଙ୍କ ବାକ୍ୟରେ ଲାଗି ରୁହନ୍ତୁ । ଯିଶାଇୟ ୨୬:୩ ଯାହାର ମନ ସଦାପ୍ରଭୁଙ୍କ ଉପରେ ସ୍ଥିର ଥାଏ, ତାହାକୁ ସେ ସମ୍ପୂର୍ଣ୍ଣ ଶାନ୍ତିରେ ରଖିବାକୁ ପ୍ରତିଜ୍ଞା କରିଛନ୍ତି । ପ୍ରଭୁଙ୍କ ମଧ୍ୟରେ ନିଜକୁ ଉତ୍ସାହିତ କରିବା ବିଷୟରେ ଉଦ୍ଦେଶ୍ୟମୂଳକ ହୁଅନ୍ତୁ, କାରଣ ନକାରାତ୍ମକ ଜଗତରେ ଉତ୍ସାହିତ ହେବା ରୀତି ନୁହଁ ।